Ivi p'acchianari a lu Naruri
e di l'agghiastru spattu
a vuàutri pani e alivi.
Jo vi mannu lupi tra l'agneddi
pi' vattiàri l'omu stortu
a lingua nova... e allura iti!
Pistatici 'a mirudda 'nto 'n muttaru
e siminatici simenza pi' lu cielu
mai cchiù scuru!
Orvi li faciti e li miruddi addummisciuti
nta l'aricchi chiantati chiova
mentri 'n mucca calàti un tronu.
Orvi iddi irrannu
nta li peri lu riaulu zuppiddu
'nveci 'n pettu cucitici un focu
e lassatili suli a lu scuru...
...cchiù scuru, iti!
Iti a vattiari un munnu novu
ri pecuri addummisciuti
cu' la lingua avvilinata...Iti!